ગુજરાત એસટી બસને અંબાજી નજીક અકસ્માત નડ્યો હોવાની ઘટના બની હતી. અમદાવાદથી અંબાજી જતી બસ અંબાજી નજીક ખાડામાં ખાબકી હતી. બસના ડ્રાઇવરે અચાકન સ્ટેયરિંગ ઉપરથી કાબુ ગુમાવતા આ દુર્ઘટના સર્જાઇ હોવાનું સુત્રો દ્વારા જાણવા મળી રહ્યું છે. જોકે, આ ઘટનામાં બસમાં સવાર 45 લોકોનો આબાદ બચાવ થયો છે. જ્યારે બસના ડ્રાઇવરને ઇજાઓ પહોંચતા હોસ્પિટલ ખસેડવામાં આવ્યા છે. બસ જ્યારે ખાડામાં ખાબકી ત્યારે આ બસ નજીકમાં પસાર થતાં વીજ વાયરને અડકી હતી જોકે, વીજપુરવઠો બંધ હોવાના કારણે એક મોટી દુર્ઘટના ટળી હતી.
ઘટનાની જાણ થતાં જ સ્થાનિક લોકોના ટોળા એકઠાં થયા હતા. અને બચાવ કામગીરી હાથધરી હતી. બસમાં સવાર 45 જેટલા લોકોને બસમાંથી બહાર કાઢીને સલામત રીતે અંબાજી ખસેડવામાં આવ્યા હતા.
