મુંબઇ,તા.૨૯
ઈંગ્લેન્ડે ભારત સામેની ટેસ્ટ માટે ટીમની જાહેરાત કરી છે. ન્યુઝીલેન્ડ સાથેની ટેસ્ટ સીરીઝ પૂરી થતાની સાથે જ ઈંગ્લિશ ક્રિકેટ બોર્ડે ૧ જુલાઈના રોજ યોજાનારી એજબેસ્ટન ટેસ્ટ માટે તેની ૧૫ સભ્યોની ટીમની જાહેરાત કરી છે. જેમાં ન્યૂઝીલેન્ડ સામેની ટેસ્ટ શ્રેણીમાં સામેલ તમામ ખેલાડીઓને જગ્યા આપવામાં આવી છે. આ સાથે સેમ બિલિંગ્સને પણ તક આપી છે. બેન ફોક્સ કોવિડ-૧૯ સંક્રમિત હોવાનું બહાર આવ્યા બાદ સેમ બિલિંગ્સને તેના વિકલ્પ તરીકે ટેસ્ટ ટીમનો ભાગ બનવાની તક મળી છે.બેન ફોક્સ ભારત સામેની ટેસ્ટ ટીમનો ભાગ છે પરંતુ હાલમાં તે કોવિડ-૧૯ આઈસોલેશન પીરિયડમાં છે. જો તે ૧ જુલાઈ પહેલા સંપૂર્ણ ફિટ નહીં થાય તો સેમ બિલિંગ્સને ભારત સામેની પ્લેઈંગ ઈલેવનમાં સામેલ કરવામાં આવશે. ઈંગ્લેન્ડ માટે સારી વાત એ છે કે પગની ઘૂંટીમાં ઈજાના કારણે ન્યૂઝીલેન્ડ સામેની ત્રણ મેચની ટેસ્ટ શ્રેણીની છેલ્લી મેચમાં રમી ન શકનાર જેમ્સ એન્ડરસન પણ ઈંગ્લિશ ટીમનો ભાગ છે. તે હવે સંપૂર્ણપણે ફિટ છે.
ભારત અને ઈંગ્લેન્ડ વચ્ચે ૧ જુલાઈથી એજબેસ્ટન ક્રિકેટ સ્ટેડિયમમાં ટેસ્ટ મેચ રમાશે. આ ટેસ્ટ ગયા વર્ષે રમાયેલી પાંચ મેચોની ટેસ્ટ શ્રેણીની છેલ્લી મેચ છે. ગયા વર્ષે કોરાનાને કારણે આ ટેસ્ટ સિરીઝ પૂરી થઈ શકી ન હતી. આ ટેસ્ટ શ્રેણીની અત્યાર સુધીની ચાર મેચોમાં ભારતીય ટીમ ૨-૧થી આગળ છે. બંને ટીમોની યાદી ઈંગ્લેન્ડ ટેસ્ટ ટીમઃ બેન સ્ટોક્સ (કેપ્ટન), જેમ્સ એન્ડરસન, જોની બેરસ્ટો, સેમ બિલિંગ્સ, સ્ટુઅર્ટ બ્રોડ, હેરી બ્રુક, જેક ક્રોલી, બેન ફોક્સ, જેક લીચ, એલેક્સ લી, ક્રેગ ઓવરટન, જેમી ઓવરટોન, મેથ્યુ પોટ્સ, ઓલી પોપ અને જો રુટ.
ભારતીય ટેસ્ટ ટીમઃ રોહિત શર્મા (કેપ્ટન), શુભમન ગિલ, વિરાટ કોહલી, શ્રેયસ અય્યર, હનુમા વિહારી, ચેતેશ્વર પૂજારા, ઋષભ પંત (વિકેટમેન), કેએસ ભરત (વિકેટકીન), રવિન્દ્ર જાડેજા, રવિચંદ્રન અશ્વિન, શાર્દુલ ઠાકુર, મોહમ્મદ શમી, જસપ્રીત બુમરાહ, મોહમ્મદ સિરાજ, ઉમેશ યાદવ, ફેમસ ક્રિષ્ના અને મયંક અગ્રવાલ.
