લેગ સ્પિનર ઇમરાન તાહિરની પાંચ વિકેટની મદદથી દક્ષિણ આફ્રિકાએ પ્રથમ ટી-૨૦ આંતરરાષ્ટ્રીય ક્રિકેટ મેચમાં ઝિમ્બાબ્વેને ૩૪ રનથી હરાવી દીધું હતું. દક્ષિણ આફ્રિકાએ પ્રથમ બેટિંગ કરતા ૬ વિકેટના ભોગે ૧૬૦ રન બનાવ્યા હતા અને પછી તાહિર (૨૩ રનમાં પાંચ વિકેટ)ની મદદથી યજમાન ટીમને ૧૨૬ રનમાં ઓલઆઉટ કરી દીધી હતી. તાહિર નવા બોલ સાથે બોલિંગ કરવા ઉતર્યો અને તેણે ઝિમ્બાબ્વેની પ્રથમ ત્રણ વિકેટ ઝડપી હતી. તેણે પોતાના બીજા સ્પેલમાં સતત બે બોલ પર બે વિકેટ ઝડપી, જેનાથી યજમાન ટીમનો સ્કોર ૬ વિકેટ પર ૬૫ રન થઈ ગયો હતો. પીટર મૂરે સ્પિનર તબરેઝ શમ્સીની ઓવરમાં સતત ચાર સિક્સ ફટકારી અને બ્રેન્ડન માવુતાની સાથે આઠમી વિકેટ માટે ૧૯ બોલમાં ૫૩ રન જોડીને ઝિમ્બાબ્વેની આશા જગાવી હતી, પરંતુ આ ભાગીદારી તૂટતા ઝિમ્બાબ્વે હારી ગયું હતું. મૂરે ૨૧ બોલમાં ૪૪ જ્યારે માવુતાએ ૧૪ બોલમાં ૨૮ રન બનાવ્યા હતા. આ પહેલા સાઉથ આફ્રિકા માટે પર્દાપણ કરનાર રેસી વાન ડેર દુસેને ૫૬ રન બનાવ્યા હતા.
