ભારતીય ક્રિકેટ ટીમના કેપ્ટન વિરાટ કોહલીએ બુધવારે એક વધુ સારી ઈનિંગ રમીને આઈ એસ બિન્દ્રા પંજાબ ક્રિકેટ સ્ટેડિયમમાં રમાયેલી બીજી ટી-૨૦ મેચમાં દક્ષિણ આફ્રિકાને સાત વિકેટથી હરાવવામાં સિંહ ફાળો આપ્યો. આ જીતથી ખુશ થયેલા વિરાટ કોહલી માટે આ મેદાન પર જૂની યાદો તાજી થઈ ગઈ હતી.
કોહલીએ થોડા દિવસ પહેલા ઈન્સ્ટાગ્રામ પર તે મેચની તસવીર પણ શેર કરી હતી. દક્ષિણ આફ્રિકા સાથે મેચ રમાયા બાદ જ્યારે કોહલીને મેન ઓફ ધી મેચનો પુરસ્કાર મળ્યો અને તે લેવા માટે પહોંચ્યો તો હોસ્ટ સંજય માંજરેકરે ઓસ્ટ્રેલિયા વિરુદ્ધ મેચની વાત પૂછી જેના પર કોહલીએ હસતાં હસતાં કહ્યું કે તમે મને મારી કેરિયરની સર્વશ્રેષ્ઠ ટી-૨૦ મેચની યાદ અપાવી. તેનાથી મને વધુ પ્રોત્સાહન મળશે.
કોહલીએ કહ્યું કે આજની પિચ જો કે તે મેચની પિચ કરતા થોડી અલગ હતી. તે હંમેશા મારી સારી યાદોમાં રહેશે. પરંતુ આજની વિકેટ પણ સારી હતી. બોલરોએ અમારા માટે સારું કર્યું. પિચ સારી હતી અને તેમે શરૂઆત પણ સારી અપાવી. પોતાની નિરંતરતા વિશે વાત કરતા કોહલીએ કહ્યું કે મારી ટીશર્ટ સામે લાગેલો બેચ મને પ્રેરિત કરે છે. પોતાના દેશ માટે રમવું એ ગર્વની વાત છે. આથી તેના માટે જે હશે તે કરીશ. ભારતે આ મેચને જીતીને ટી-૨૦ સિરીઝમાં ૧-૦ની લીડ મેળવી લીધી છે. ધર્મશાળામાં રમાયેલી પહેલી મેચ વરસાદના કારણે રદ થઈ ગઈ હતી.
