એલ્ગાર મામલામાં આરોપી ફાધર સ્ટેન સ્વામીનું નિધન

212

૮૪ વર્ષીય સ્વામી અનેક બીમારીઓથી પીડિત હતા : બોમ્બે હાઇકોર્ટમાં વકીલે સોમવારે ફાધર સ્ટેન સ્વામીની જામીન પર કોર્ટમાં સુનાવણી સમયે આ માહિતી આપી
(સં. સ. સે.) નવી દિલ્હી, તા.૫
એલ્ગાર પરિષદ મામલામાં આરોપી રહેલા ફાધર સ્ટેન સ્વામીનું સોમવારે નિધન થયું છે. ૮૪ વર્ષીય સ્વામી પાર્કિસંસ રોગ સહિત અનેક બીમારીઓથી પીડિત હતા. તેઓ ગયા વર્ષે કોવિડ સંક્રમિત પણ થયા હતા. બોમ્બે હાઇકોર્ટમાં તેમના વકીલે એક સુનાવણી દરમિયાન એ સૂચના આપી. આજે જ ફાધર સ્ટેન સ્વામીની જામીન અરજી પર હાઈકોર્ટમાં સુનાવણી ચાલી રહી હતી. હાઈકોર્ટમાં સુનાવણી દરમિયાન ડૉ. ડિસૂઝાએ કહ્યું કે, ખૂબ ભારે મનથી આપને સૂચિત કરવા પડી રહ્યા છે કે ફાધર સ્ટેન સ્વામીનું નિધન થઈ ગયું છે.ફાધર સ્ટેન સ્વામીનો પક્ષ રજૂ કરી રહેલા સીનિયર એડવોકેટ મિહિર દેસાઈએ કહ્યું કે, એ પહેલા કે હું કંઈ કહું, મેડિકલ ડાયરેક્ટર ડૉ. ડિસૂઝા કંઈક કહેવા માંગે છે. ત્યારબાદ ડૉ. ડિસૂઝાએ કોર્ટને સ્વામીના નિધનની જાણકારી આપી. ડૉ. ડિસૂઝાએ કહ્યું કે, શનિવાર સવારે ૪ઃ૩૦ વાગ્યે તેમને કાર્ડિયાક અરેસ્ટ આવ્યો, અમે તેમને બચાવી ન શક્યા. જસ્ટિસ એસ.એસ. શિંદે અને જસ્ટિસ એન.જે. જમાદારની બેન્ચની સમક્ષ સુનાવણી દરમિયાન જ સ્વામીના નિધનની સૂચના આવી હતી. નિધનની સૂચના મેળવ્યા બાદ કોર્ટે કહ્યું કે, અમને એ જાણીને ખૂબ ખેદ છે કે તેમનું નિધન થઈ ગયું છે. અમે સ્તબ્ધ છીએ. ત્યારબાદ તેમના વકીલ અને સીનિયર એડવોકેટ મિહિર દેસાઈએ કહ્યું કે તેમને હોસ્પિટલમાં ઉત્તમકક્ષાની સારવાર આપવામાં આવી હતી. આ સાથે તેમણે કોર્ટને કહ્યું કે સ્ટેન સ્વામીના મૃતદેહને ફાધર ફ્રેઝરને સોંપવામાં આવે. જેઓ સે. ઝેવિયર કોલેજના નિવૃત્ત પ્રિન્સિપલ છે અને આ જ કોર્ટ દ્વારા તેમને હોસ્પિટલની અંદર ફાધર સ્ટેન સ્વામીને મળવાની મંજૂરી આપવામાં આવી હતી.
આ સાથે દેસાઈએ ઉમેર્યું હતું કે, ’અમે પોસ્ટ મોર્ટમ અંગે કોઈ વિરોધ નથી. જોકે આ સાથે તેમણે કોર્ટને કહ્યું હતું તે પોસ્ટ મોર્ટમના તમામ રિપોર્ટ આ કોર્ટમાં જમા કરાવવામાં આવે અને તમામ મેડિકલ કાર્યવાહી એનએચઆરસીની ગાઈડલાઈન્સ મુજબ કરવામં આવે. ગત મહિને, એનઆઇએએ હાઈકોર્ટની સમક્ષ સોગંદનામું દાખલ કરીને સ્વામીની જામીનનો વિરોધ કર્યો હતો. એનઆઈએએ કહ્યું હતું કે તેમની બીમારીના કોઈ મજબૂત પુરાવા નથી. એનઆઈએએ આરોપ લગાવ્યો હતો કે સ્વામી માઓવાદી હતા જેઓએ દેશમાં અશાંતિ ઊભી કરવાનું કાવતરું રચ્યું હતું. એલ્ગાર પરિષદ મામલો ૩૧ ડિસેમ્બર ૨૦૧૭નો છે, જેમાં પુણેમાં એક સંમેલનમાં ઉશ્કેરીજનક ભાષણો સંબંધિત છે જેના વિશે પોલીસે દાવો કર્યો છે કે બીજા દિવસે આ ભાષણોના કારણે ભીમા-કોરેગાંવ યુદ્ધ સ્મારકની પાસે હિંસા થઈ હતી.