પંચમહાલ પંથકમાં ભાવી ભરથારને ત્યાં માતા-પિતા સાથે ગયેલી સગીરાને આંબાવાડીમાં ખેંચી જઇ શખ્સે કરેલું કૃત્ય
સિહોરની સગીરા સાથે તેના ભાવી ભરથારે બળજબરીપૂર્વક આંબાવાડીમાં ખેંચી જઇ દુષ્કર્મ આચર્યાની પોલીસ ફરિયાદ નોંધાઇ છે. આ બનાવ પંચમહાલ પંથકમાં બન્યો હોવાથી સિહોર પોલીસે ૦ નંબરથી ફરિયાદ લઇ સંબંધિત પોલીસ મથકને મોકલી આપી હતી. આ ચકચારી બનાવ અંગે ઉપલબ્ધ વિગતો મુજબ સિહોરમાં રહેતા ફરિયાદીએ એવા મતલબની ફરિયાદ નોંધાવી હતી કે, તેની ૧૭ વર્ષની દિકરીનું વેવિશાળ નવરંગપુરા, ખાખરીયા વાડી-હાલોલ, પંચમહાલ ખાતે રહેતા યુવાન સાથે કર્યું હતું. દરમિયાનમાં તેઓ પરિવાર સાથે પંચમહાલ જમાઇને ત્યાં ગયા હતા ત્યારે તેની સગીર દિકરી સાથે બળજબરી કરી આંબાવાડીમાં લઇ જઇ સગીરાના ભાવી ભરથારે જ દુષ્કર્મ આચર્યું હતું. જ્યારે આ બનાવના બે દિવસ બાદ ફરી વખત આ પ્રકારે જ કૃત્ય કર્યું હતું અને સગીરાના માતા-પિતાને મારી નાખવા ધમકી આપી હતી. આ બનાવ અંગે સગીરાના પિતાએ તેના વેવાઇને ફરિયાદ કરતા તેઓએ પણ ઉશ્કેરાઇ જઇ અને ઝઘડો કરી જીવતા દાટી દઇશુ તે પ્રકારે ધમકી આપી હતી. આ બનાવ અંગે ભોગ બનનારે સિહોર પોલીસ મથકમાં ગુનો નોંધાવતા પોલીસે ૩૭૬ સહિતની કલમો તળે ગુનો નોંધી ફરિયાદ સંબંધિત પોલીસ મથકને મોકલી આપી હતી.
