રાષ્ટ્રીય પ્રતિકમાં સિંહના આક્રમક હાવભાવને લઈ જોરદાર વિવાદ

4

વિરોધપક્ષોએ નરેન્દ્ર મોદી સરકાર પર ચાર સિંહના હાવભાવ બદલીને બંધારણના ઉલ્લંઘનનો આરોપ મૂક્યો
નવી દિલ્હી,તા.૧૨
સોમવારે સંસદ ભવનના નવા બિલ્ડિંગ પર વડા પ્રધાન નરેન્દ્ર મોદી દ્વારા રાષ્ટ્રીય પ્રતિક અનાવરણ બાદ ટીકાઓ થઈ રહી છે. હવે વિરોધ પક્ષના નેતાઓ દ્વારા કાસ્ટને જ નિશાન બનાવવામાં આવી રહ્યું છે. જો કે, નરેન્દ્ર મોદી સરકારે કાસ્ટને ન્યાયી ઠેરવ્યું છે અને કહ્યું છે કે તે સંશોધન અને સારી રીતે ગોઠવેલી પ્રક્રિયા પછી કરવામાં આવ્યું હતું. રાષ્ટ્રી પ્રતિકના ચાર સિંહના હાવભાવને લઈને ઘણા રાજકીય પક્ષોના નેતાઓએ આકરી ટીકાઓ કરી છે. તેમણે નરેન્દ્ર મોદી સરકાર પર ચાર સિંહના હાવભાવ બદલીને બંધારણના ઉલ્લંઘનનો આરોપ મૂક્યો છે. વિવેચકો મોદી સરકારને નિશાન બનાવવા માટે ઉત્તર પ્રદેશના સારનાથ ખાતે ‘લાયન કેપિટલ ઓફ અશોક’ ખાતેના નવા સંસદ ભવન ઉપર રાષ્ટ્રીય પ્રતિકમાં ચાર સિંહોની અભિવ્યક્તિની સરખામણી કરી રહ્યા છે. તેમણે દાવો કર્યો છે કે અશોક સ્તંભ પર રહેલા ચાર સિંહના હાવભાવ એકદમ સોબર અને શાંતિ પ્રિય છે જ્યારે નવા સિંહના હાવભાવ આક્રમક છે.કોંગ્રેસના સોશિયલ મીડિયાના નેશનલ કોઓર્ડિનેટર વિનય કુમાર ડોકાનીયાએ ટિ્‌વટર પર આ અંગે મોદી સરકારની ટીકા કરી હતી. તેમણે લખ્યું હતું કે, શાંતિ પ્રિયથી આદમખોર સુધી. અદ્દભુત, શાંતિ-પ્રિય, શાંત અને ભવ્ય સિંહ હવે તેના નવા દેખાવમાં ગુસ્સે, ક્રૂર, ધમકીભર્યા અને હિંસક દેખાય છે. લગભગ નફરત ફેલાવતા રંગા બિલ્લા અને તેમના ૮ વર્ષના વિશ્વાસઘાત શાસનની નકલ કરે છે… શું આપણે પૂછી શકીએ છીએ કે શા માટે મોદી સરકાર આપણા રાષ્ટ્રીય પ્રતિકનો નાશ કરી રહ્યા છે? ટીએમસી સાંસદ મહુઆ મોઈત્રાએ કોઈ પણ કોમેન્ટ કર્યા વગર ’લાયન કેપિટલ ઓફ અશોકા’ની બે તસ્વીરો પોસ્ટ કરી છે. ડાબી તરફની તસ્વીર જૂની છે જ્યારે જમણી તરફ રહેલી તસ્વીર વડાપ્રધાન મોદી દ્વારા અનાવરણ કરવામાં આવેલા સિંહની છે. ટીએમસીના અન્ય એક સાંસદ જાવહર સરકારે લખ્યું હતું કે, આપણા રાષ્ટ્રીય પ્રતિક એવા ભવ્ય અશોકા લાયન્સનું અપમાન છે. મૂળ ડાબી બાજુએ છે, આકર્ષક, નિયમિતપણે આત્મવિશ્વાસુ. જમણી બાજુનું એક મોદીનું સંસ્કરણ છે, જે સંસદની નવી ઈમારતની ઉપર મૂકવામાં આવ્યું છે – બિનજરૂરી રીતે આક્રમક અને અપ્રમાણસર. શેમ! તરત જ બદલી નાંખો!સુપ્રીમ કોર્ટના વકીલ પ્રશાંત ભૂષણે વધારે આક્રમક રીતે આની ટીકા કરી છે.