દેશનું સ્વર્ગ ગણાતું જમ્મુ-કાશ્મીર પર સફેદ સંકટ છવાયું છે. અહીં છેલ્લા બે મહિનાથી અટકી અટકીને હિમવર્ષા થઈ રહી છે જેનાથી સ્થાનિકોને જ નહીં સરહદ પરના સૈનિકો પણ મુશ્કેલીમાં મુકાઇ રહ્યાં છે ઉત્તર કાશ્મીરમાં ગુલમર્ગ ઘાટીમાં સૌથી ઠંડો વિસ્તાર રહ્યો છે હવામાન વિભાગે કાશ્મીર ખીણમાં 6 જાન્યુઆરી સુધી હિમવર્ષાની સંભાવના દર્શાવી છે જેના કારણે રાજ્યના ઘણા ભાગોમાં પારો ગગડીને શૂન્યની નીચે ઉતરી ગયો. શ્રીનગરમાં પણ હિમવર્ષા થતાં લોકોના ચહેરા ખીલી ઉઠ્યા. શ્રીનગર એરપોર્ટ પર વિમાની સેવાને અસર પહોંચી હતી. હળવા વરસાદ અને હિમવર્ષાના કારણે શ્રીનગર-જમ્મુ નેશનલ હાઇવે પર એક તરફી વાહન વ્યવહાર ચાલુ કરાયો હતો. ભારે હિમવર્ષાને કારણે શુક્રવારે સાંજે જવાહર ટનલથી કાશ્મીર જતા વાહનોને ઉધમપુર પાસે અટકાવી દેવાયા હતા. બંન્ને તરફથી હજારોની સંખ્યામાં વાહનો ફસાયા હતા. રાજોરી અને પૂંછ જિલ્લાને કાશ્મીર સાથે જોડનારો મુગલ રોડ ત્રીજા દિવસે પણ બંધ રહ્યો છે જોકે હવામાનમાં સુધારો થવાની સંભાવના દર્શાવાઇ છે. રાજ્યમાં કારગીલમાં પારો ગગડીને શૂન્યથી નીચે માઇનસ 18.6 ડિગ્રી સુધી પહોંચી ગયો. જ્યારે કે લેહમાં માઇનસ 14.5 ડિગ્રી ગુલમર્ગમાં માઇનસ 10 ડિગ્રી પહલગામમાં માઇનસ 6.8 ડિગ્રી નોંધાયુ હતુ. બરફના કારણે પર્વતો પર સફેદ ચાદર છવાઈ છે. હિમવર્ષાને કારણે વાહનવ્યવહાર ઠપ થયો છે. દેશભરના આ રાજયોના પર્યટન સ્થળોએ ઠંડી અને હિમપાતની મજા માણવા સહેલાણીઓ ઉમટી પડતા હોય છે.
