રાજ્ય સરકારે ગુજરાત સ્ટેમ્પ વેચાણના નિયમોમાં કરેલ સુધારા મુજબ આગામી તા. ૧લી ઓક્ટોબર, ૨૦૧૯થી સમગ્ર ગુજરાતમાં નોન જ્યુડિશિયલ ફીઝીકલ સ્ટેમ્પ પેપરનો ઉપયોગ અને વેચાણ બંધ કરવાનો નિર્ણય કર્યો છે. આ સંદર્ભે જાહેર જનતાને તેઓના અલગ-અલગ પ્રકારના લેખો ઉપર વાપરવામાં આવતાં જરૂરી સ્ટેમ્પ મેળવવામાં મુશ્કેલી કે અગવડતા ન પડે અને જરૂરી માહિતી અને જાણકારી મળી રહે તે માટે અમદાવાદ જિલ્લામાં પણ અમદાવાદના સ્ટેમ્પ ડયુટી મૂલ્યાંકનતંત્રએ વ્યવસ્થા કરી છે તેમ સ્ટેમ્પ ડયુટી મૂલ્યાંકનતંત્રના નાયબ કલેકટરની અખબારી યાદીમાં જણાવ્યું છે.
આ અખબારી યાદીમાં જણાવ્યા પ્રમાણે ફીઝીકલ નોન-જયુડિશિયલ સ્ટેમ્પનું ૧/૧૦/૧૯થી વેચાણ બંધ થતાં જાહેર જનતાને તેઓના અલગ- અલગ પ્રકારના લેખો ઉપર વાપરવામાં આવતાં જરૂરી સ્ટેમ્પ મેળવવામાં મુશ્કેલી કે અગવડતા ન પડે તે માટે હાલમાં અમદાવાદમાં કુલ-૬૦ જેટલા ઇ-સ્ટેમ્પિંગ કેન્દ્રો તેમજ કુલ-૧૬૯ જેટલી બેંકોમાં ફ્રેન્કિંગ મશીનની સુવિધા ઉપલબ્ધ કરાવવામાં આવી છે. જેઓ પાસેથી જાહેર જનતા સ્ટેમ્પની ખરીદી કરી શકે છે.
ઉપરાંત ફીઝીકલ નોન-જયુડિશિયલ સ્ટેમ્પનું વેચાણ બંધ કરી સરકારશ્રી ડિજિટાઇઝેશનના અભિગમ અન્વયે સ્ટેમ્પ વેન્ડર, નોટરી, ચાર્ટર્ડ એકાઉન્ટન્ટ, કંપની સેક્રેટરી તેમજ બેંકોને પણ ઇ-સ્ટેમ્પિંગ લાયસન્સ આપવાનું નકકી કરવામાં આવેલ છે. જે માટે લાયસન્સ મેળવવા માટેની અરજી કરી શકે છે.
સ્ટેમ્પ ડયુટી મુલ્યાંકનતંત્રના નાયબ કલેકટરશ્રી એ ખાસ જણાવ્યું છે કે જાહેર જનતા દ્વારા તા.૩૦/૦૯/૨૦૧૯ના રોજ કે તે પહેલાં ખરીદ કરેલ સ્ટેમ્પ પેપર, સરકારશ્રીના નિયમોનુસાર સ્ટેમ્પ ખરીદ કર્યા તારીખથી છ માસ સુધી વાપરી શકાશે. આથી, જે લોકોએ ફીઝીકલ સ્ટેમ્પ ખરીદેલ હોય તેઓએ ગભરાવાની કોઇ જરૂરિયાત નથી. આ માટેની વધુ માહિતી માટે પોલિટેકનિક કમ્પાઉન્ડ ખાતે આવેલ નાયબ કલેકટર, સ્ટેમ્પ ડયુટી મૂલ્યાંકનતંત્રની કચેરીનો સંપર્ક કરી શકાશે. ફીઝીકલ નોન-જયુડિશિયલ સ્ટેમ્પ પેપરનું વેચાણ બંધ કરવામાં આવનાર છે તેથી સ્ટેમ્પ વેન્ડર્સ અને પોસ્ટ ઓફિસ મારફત તા.૩૦/૦૯/૨૦૧૯ સુધી ફીઝીકલ નોન-જયુડિશિયલ સ્ટેમ્પ પેપરનું વેચાણ થઇ શકશે.
