જલદી લર્નિંગ લાઈસન્સ માટે મોબાઈલમાં ટેસ્ટ આપી શકાશેે

777

લર્નિંગ ડ્રાઈવિંગ લાઈસન્સમાં કાગળીયા ચેક કરાવવાની અને અપોઈન્ટમેન્ટ લેવાની ઝંઝટમાંથી મુક્તિ મળશે
(સંપૂર્ણ સમાચાર સેવા)
અમદાવાદ, તા.૮
ડ્રાઈવિંગ લાઈસન્સ માટે રિજનલ ટ્રાન્સપોર્ટ ઓફિસના ધક્કા ખાવા પડે છે, પરંતુ, ઓગસ્ટથી આ ધક્કા ખાવાથી આઝાદી મળી શકે છે. એટલે લર્નિંગ લાઈસન્સ માટે રિજનલ ટ્રાન્સપોર્ટ ઓફિસ કે પછી એક્ઝામિનેશન સેન્ટર જવાની જરુરી નહીં પડે. રોડ ટ્રાન્સપોર્ટ ડિપાર્ટમેન્ટ દ્વારા નક્કી કરવામાં આવ્યું છે કે ડ્રાઈવિંગ ટેસ્ટ માટેની પરીક્ષા ઓનલાઈન લેવામાં આવશે. જેમાં મોબાઈલ એપ્લિકેશન અથવા ડેસ્કટોપ કમ્પ્યુટરનો ઉપયોગ કરી શકાશે.ડિપાર્ટમેન્ટ દ્વારા એ પણ નક્કી કરવામાં આવ્યું છે કે, ડ્રાઈવિંગ લાઈસન્સ ટેસ્ટ સવારે ૬ વાગ્યાથી રાતના ૧૦.૩૦ સુધી રાખવામાં આવે. સ્પેશિયલ ટ્રેક પર બે શિફ્ટમાં ડ્રાઈવિંગ ટેસ્ટ યોજવામાં આવશે.મુખ્યમંત્રીના એડિશનલ ચીફ સેક્રેટરી મનોજ કુમાર દાસ પાસે પોર્ટ્‌સ અને ટ્રાન્સપોર્ટનો વધારાનો પ્રભાર છે, તેઓ જણાવે છે કે, અમે નેશનલ ઈન્ફોર્મેટિક્સ સેન્ટર ને જાણ કરી છે કે એવું સોફ્ટવેર તૈયાર કરવામાં આવે કે જેના આધારે અમે મોબાઈલ ફોન અને પર્સનલ કમ્પ્યુટર પર પરીક્ષા લઈ શકીએ. RTO ના અધિકારીઓએ જણાવ્યું કે, સરેરાશ રોજના અમદાવાદમાં ટુ-વ્હીલર, કાર અને હેવી વ્હીકલ્સના ૪૫૦ જેટલા લાયસન્સ ઈસ્યુ કરવામાં આવે છે.
વધુમાં RTO માં રહેલા અધિકારી જણાવે છે કે, હાલ ઓનલાઈન લર્નિંગ લાઈસન્સ ટેસ્ટ માટે શહેરની ITIs જ અને વેસ્ટર્ન ઈન્ડિયા ઓટોમોબાઈલ એસોસિએશનના પટાંગણમાં યોજવામાં આવે છે. સરેરાશ અહીં રોજ ૬૫૦થી ૭૦૦ અરજીઓની ટેસ્ટ લેવામાં આવે છે, આ પહેલા તેમને RTO જવું પડતું હતું અને અહીં તેમની ટેસ્ટ લેવાયા બાદITIs દ્વારા તેમને અપ્રુવલ આપવામાં આવતી હતી.એક સિનિયર અધિકારીએ જણાવ્યું કે, હવે અરજદારો અપોઈન્ટમેન્ટ લેવાની જરુર નહીં રહે. એક વ્યક્તિ જરુરી દસ્તાવેજ અપલોડ કરી શકે છે, તેને સ્વ-પ્રમાણિત કરી શકે છે અને ઓનલાઈન પરીક્ષા આપી શકે છે. અધિકારીએ જણાવ્યું કે, વ્યક્તિના દસ્તાવેજોની સત્યતાની તપાસ ત્યારે કરવામાં આવશે જ્યારે તેઓ અંતિમ પરીક્ષા માટે આવશે. લર્નિંગ ટેસ્ટ માટે RTO ની જે ભૂમિકા છે તેને દૂર કરવામાં આવશે. તેમણે જણાવ્યું કે જો ૧૫માંથી ૧૧ સવાલ અરજદાર સાચા આપશે તો લર્નિંગ લાઈસન્સ જારી કરવામાં આવશે અને ઉમેદવાર તેની પ્રિન્ટ લઈ શકશે.